DUMARAO, CAPIZ- Ginpili bilang bag-o nga Presidente sang SK Federation sang banwa sang Dumarao si Hon. Benjie Hallarda, kasunod sang pagdisqualify sang anay Presidente nga si Glen Rey Capuso sang Brgy. Salcedo.
Sa interview sang Bombo Radyo kay Benjie Hallarda, iya ginpahayag nga nagtapos sya sa Capiz State University – Dumarao Satellite College sa kurso nga Bachelor of Secondary Education, major in Science kag suno sa iya isa sya ka kilala nga consistent leader halin pa sa elementary kag sang high school, nangin SSG President siya, kag sa kolehiyo naman, nangin Student Supreme Council President.
Dugang pa sini nga ang pag-eleher sa iya bilang SK Federation President ginpatigayon kahapon sang alas 10 sang aga sa presensya sang mga katapo sang Philippine National Police, Commission on Elections, Department of Education, Department of Interior and Local Government (DILG), kag mga National Government Organizations. May kabug-usan nga 33 ka mga SK Chairpersons ang nagtambong.
Nahibaluan nga gindesisyunan sang DILG nga magpatigayon sang special election matapos nga gin-disqualify si Capuso bangud sa “negligence of duty.”
Samtang, si Capuso ang wala nagatambong sa mga importante nga aktibidad sang federasyon, kasubong sang Search for Lin-ay kag Hangaway sang Dumarao, Opening League kag iban pa. Wala man ini nakapahimo sang mga programa sa idalom sang iya liderato, kabangdanan nga nagreklamo ang mga SK Chairpersons kag nangayo sang bulig sa Local Youth Development Office.
Plano sa karon ni Hallarda nga ibalik ang kasanag sang SK Federation pinaagi sa pagpatuman sang mga programa nga makatandog sa kabataan. Magluwas sa mga sports activities, magatutok man siya sa mga isyu nga may dako nga epekto sa kabataan subong — partikular na ang pagtaas sang kaso sang HIV sa diin magapatigayon sila sang mga seminars kag workshops agud mapalapad ang ihibalo sang mga pamatan-on sa mga delikado nga realidad sang komunidad.
Interviewed by Bombo Sunnie Mae Batencila
