Wala nakaluwas sa pagpanglaslas sang Bagyong Carina kag hangin Habagat ang mga katapo sang Philippine National Police (PNP).
Suno kay PNP PIO Chief PCol. Jean Fajardo yara sa 1,900 nga mga kapulisan ang apektado sa lapnagon nga pagbaha partikular sa NCR.
Mahibaluan nga sa nasambit nga numero, 1,822 ang apektado nga PNP personnel samtang 33 naman ang non-uniformed personnel.
Kadungan sini, ginsiling ni Fajardo nga ginmando na ni PNP Chief PGen. Rommel Francisco Marbil nga i-account kag siguraduhon ang safety and security sang mga apektado nga kapulisan.
Magtan-ay man ang pamunuan sang bulig sa mga kapulisan kag pamilya sini nga naapektuhan sang malain nga tyempo.
Samtang, padayon naman ang humanitarian assistance and disaster response efforts sang PNP sa Metro Manila, Ilocos Region, Cagayan, Central Luzon kag Calabarzon nga lunsay napuruhan sang Bagyong Carina.
