ROXAS CITY, CAPIZ – Naglab-ot sa masobra P194 million ang balor sang iligal nga droga nga nakumpiskar sang pulisya sa Western Visayas halin Enero 1 tubtob Hulyo subong nga tuig.
Sa interview sang Bombo Radyo Roxas kay Police Major Lailyn Sencil, Spokesperson sang Police Regional Office 6 (PRO-6), iya ginpahayag nga kabug-usan nga 723 operation batuk sa iligal nga droga ang ila ginpatigayon sa rehiyon sa una nga pito ka bulan sang 2025.
Nadakpan sang mga otoridad sa operasyon ang 935 drug suspects, kalakip na ang pila ka mga ginakabig nga high-value targets. Ginabulubanta yara sa 28,538 grams sang shabu ang kabug-usan nga kadamuon sang nakumpiskar sa mga operasyon.
Ginpasiguro naman sang newly appointed Regional Director sang PRO-6 nga si Police Brigadier General Josefino Ligan nga padayon ang ila masangkad nga kampanya kontra droga kabulig ang nagkalain-lain nga ahensya sang gobyerno kag mga stakeholder.
Dugang pa sini nga padayon man ang ila pagpabaskog sang koordinasyon sa mga komunidad agud dalayon nga matapna ang kalakaran sang iligal nga droga sa rehiyon.
– Interviewed by: Bombo Lynd-C Bade
