ROXAS CITY, CAPIZ- Nangin madinalag-on ang ginpatigayon nga Handog ng Pangulo: Serbisyong Sapat para sa Lahat program sa Roxas City, Capiz bilang kabahin sang pagselebrar sang kaadlawan ni Presidente Ferdinand Marcos Jr. sang Setyembre 13, 2025 kun sa diin gindugok ini sang mga pumuluyo agud nga magbenepisyo sa programa sang gobyerno.
Isa sa mga napanguna nga aktibidad sang programa amo ang pagbaligya sang bugas sa balor nga P20 kada kilo sa idalom sang Kapitolyo Probinsyal, nga ginbenpisyuhan sang kapin 1,500 ka mga indibidwal.
Sa interview sang Bombo Radyo kay Mr. Raoul Perez, Acting Provincial Agriculturist sang Office of the Provincial Agriculturist – Capiz, iya ginpahayag nga naglab-ot sa 300 ka sako sang bugas ang naubos sa amo nga aktibidad.
Suno sa iya, bukas ini para sa tanan nga may government-issued ID, kag indi lang para sa mga kalakip sa vulnerable sectors.
Magluwas sang barato nga bugas, nagpanagtag man ang talatapan sang mga binhi nga utan bilang dugang nga bulig sa mga pumuluyo. Gindungan man diri ang pagpanagtag sang Rice Financial Assistance Program sang Department of Agriculture, kun sa diin 400 ka mga newly identified farmers ang nakabaton sang P7,000 nga bulig pinansyal.
Samtang, nagpanagtag man sang mga indemnity check ang Philippine Crop Insurance Corporation sa 143 ka mga mangunguma nga naapektuhan sang mga kalamidad, bilang kabahin sang ila nga calamity insurance coverage.
Pahayag pa sang natungdan, bukas ang opisina sang Provincial Agriculturist para sa tanan nga mangunguma sa Capiz, agud maghatag sang mga kinahanglan nga bulig kag suporta sa pagpasangkad sang ila nga pangabuhian.
Interviewed by Bombo Sunnie Mae Constantino Batencila
