Ginpasaka sang Department of Justice (DOJ) sang Lunes ang qualified human trafficking case batuk sa anay presidential spokesperson Harry Roque.
Ini ang may kaangtanan sa iya pag-intra sa operasyon sang iligal nga Philippine Offshore Gaming Operators (POGO) sa Porac, Pampanga.
Si Justice Undersecretary Nicholas Felix Ty nagsiling nga sanday Cassandra Ong, Wu Duanren sang Whirlwidn Corporation, Dennis Cunanan kag 30 ka iban pa ang ginpasakaan man sang kaso.
Dugang pa ni Ty nga maathag ang kahilabtanan sang akusado sa paggamit sang institusyon para sa human trafficking.
Una nga ginpasakaan sang kaso sang Presidential Anti-Organized Crime Commission (PAOCC) ang authorized representative sang Lucky South 99 nga si Katherine Cassandra Li Ong kag iban pa.
Nalakip man si Roque sa supplemental complaint nga ginpasaka sang Oktubre 2024.
Ginpanindugan ni Ty nga bisan abogado ni Whirlwind si Roque, personal siya nga nagpadulong sa Philippine Amusement Gaming Corporation (PAGCOR) para sa renewal sang aplikasyon sang Lucky South 99.
