ROXAS CITY – Yara na karon sa health center sa Barangay Balighot, Maayon, Capiz ang isa ka 52 anyos nga lalaki nga isa ka locally-stranded individual para sa iya nga 14-day quarantine period.
Ini ang ginkompirmar ni Punong Barangay Meladie Calinao sang mainterview sang Bombo Radyo.
Suno kay Calinao nga nadesisyunan nila nga sa amo nga pasilidad pateniron ang nasambit nga LSI bangud nagapamalabag ang pila ka pumuluyo sa una kuntani nga pahamtangan sa iya nga amo ang ila nga Day Care center.
Mahibaluan nga nagareklamo ang mga residente sa una kuntani nga pahamtangan sa amo nga LSI bangud madamo sang pamalay ang nagapalibot diri.
Matandaan nga may nagluntad pa nga komosyon sa tunga sang tag-iya sang duta nga ginahamtangan sang Day Care center kag sa anak sang LSI bangud sa indi pagkasugot sa pagahimuon nga quarantine facility.
Suno kay Calinao nga nagikan sa Metro Manila ang amo nga LSI kag nag-abot sa ila banwa sadtong Hulyo 16.
