ROXAS CITY – Nahilapit na nga matapos ang hearing para sa 2022 Annual Budget sang provincial government.
Ini ang ginkumpirmar ni Board Member Jonathan Sonny Besa, Chairman of Committee on Aprropriations sang mainterview sang Bombo Radyo.
Suno diri, 9 na lang ka departamento ang wala pa natalakay ang pondo kag pagatinguhaan ini nga mahinalaan agud maaprubahan na ang 2022 annual budget sang probinsya.
Sa ginhiwat nga budget hearing sang nanliligad nga mga inadlaw kaupod ang pila ka mga departamento wala sang pagbag-o sa pondo maluwas na lamang sa health services kun sa diin paga-alokaran ini sang masobra P160M nga dugang nga pondo sa kada government hospitals.
Pahayag ni BM Besa, ginatun-an pa ang posibilidad nga pagbuhin sa pondo sang pila ka mga departamento agud mahatagan sang nagakaigo nga pondo ang prayoridad nga proyekto ni Governor Castro kaangay sang infrastraktura.
Dugang pa sini nga pagahatagan man sang nagakaigo nga igtalupangod ang sektor sang agrikultura agud may yara sang bastante nga food suplay sa bug-os nga probinsya.
Lauman suno diri nga antes magtakup ang bulan sang Agosto maaprubahan na ang 2022 budget.
Sa pihak nga bahin, natalana nga pagahinalaan sa session subong nga adlaw ang paghimo sang resolusyon para sa mas o menus 25 ka mga Civil Society Organization nga gin-accredit sang gobyerno probinsyal.
