ROXAS CITY – Ginpasidunggan sang local government sang Roxas City si Police Lieutenant Colonel Ricardo Jomuad Jr. bangud sang iya exemplary service bilang hepe sang Roxas City Police Station.
Ginhatagan ni Mayor Ronnie Dadivas sang certificate ang nasambit nga hepe bilang pagkilala sang iya matinlo kag mayo nga serbisyo sa publiko kag liderato sa kapulisan sang syudad.
Suno sa alkalde, importante nga mahatagan sang pasidungog ang mga opisyal nga nagahimakas agud masiguro ang kalinong kag katawhay sang Roxas City.
Sa interview sang Bombo Radyo kay PLt. Col. Jomuad, iya ginpahayag nga ang award ang ginatugyan niya kag ginadedikar sa mga pumuluyo sang Roxas City nga amo ang iya ginaserbisyohan.
Dugang pa sang natungdan, indi lang ini iya pasidungog kundi para man sa bug-os nga pwersa sang Roxas City PNP kag sa komunidad nga nagasuporta sa ila.
Padayon nga ginapasalamatan sang city government ang Roxas City PNP sa ila kontribusyon sa seguridad kag kaayuhan sang mga pumuluyo.
