Puno na ang hospital beds para sa mga COVID-19 patients sa Roxas Memorial Provincial Hospital.
Ini ang ginkumpirma ni Dr. Alex Nolasco, pinuno sang Provincial Health Office sang ma-interview sang Bombo Radyo.
Ginpahayag ni Nolasco naglapaw na sa hospital bed capacity nga 30 percent ang mga COVID-19 patients nga yara karon sa RMPH.
Bangud diri nagrequest na sa mga district hospitals nga mag-cater sang mga COVID patients.
Ginadala sa Bailan ukon Mambusao District Hospital ang mga moderate cases sang COVID-19 samtang kadam-an nga severe cases sang COVID-19 ang ginadala sa RMPH.
Isa pa ka problema nga ginapangatubang sa karon sang RMPH suno kay Nolasco amo ang kakulangon sang nurses sa diin madamo ang nagresign kag nagtrabaho sa iban nga pungsod.
Nahibaluan nga nagsulat na ang tagdumalahan sang RMPH sa DOH kag naghinyo sang dugang nga mga nurses.
Samtang nagpangabay si Dr. Nolasco nga ipaiway na lamang kuntani ang home quarantine, bangud indi ini garantiya nga indi malatnan ang mga kaupdanan sa balay, sa pihak nga may separado nga kuwarto kag CR.
Nagapanindugan ang opisyal nga isa ka pamaagi agud matapna ang paglapta sang corona virus ang pagtingub sa mga nagpositibo sa COVID-19 sa isa ka quarantine facility.
