Nagpagwa sang subpoena ang House Committee on Justice batok sa Bureau of Internal Revenue (BIR) kag Securities and Exchange Commission (SEC) bilang kabahin sang mas madalom nga imbestigasyon sa ginaalegar wala mapaathag nga manggad kag financial irregularities ni Vice President Sara Duterte.
Sa impeachment hearing sang Justice panel, ginpangunahan ni Batangas Rep. Gerville “Jinky Bitrics” Luistro ang hearing, gin-istoryahan ang mga mosyon nga nagahingyo sang importante nga financial documents may kaangtanan kay Duterte, sa iya asawa nga si Manases “Mans” Carpio, kag sa ila mga negosyo.
Nagpasaka sang motion si Bicol Saro Party-list Rep. Terry Ridon nga mag-issue sang subpoena ad testificandum kag duces tecum batok sa isa ka tiglawas sang BIR.
Tinutuyo sini nga makuha ang tax records nanday Duterte kag Carpio, lakip na ang mga kompaniya nga may kaangtanan sa ila.
Kalakip sa mga dokumento nga ginhingyo nagalakip sang mga rekord sang “tax compliance and reported income,” subong man ang orihinal ukon sertipikado nga kopya sang income tax returns, value-added tax payments, kag iban pa nga may kaangtanan nga rekord halin 2007 tubtob 2025 para kay Duterte kag Carpio, subong man mga dokumento sang pila ka mga korporasyon nga ila ginapanag-iyahan.
Sa isa pihak nga bahin, gin-aprubahan man sang komite ang pag-isyu sang subpoena batok sa SEC agud makakuha sang sertipikado nga kopya sang general information sheets kag audited financial statements sang amo man nga mga kompaniya nga ginsambit sa hearing.
Ang motion batuk sa SEC nga gin-file man ni Ridon ang gin-aprubahan nga may 14 ka affirmative votes, duha ang negative, kag tatlo ang nag-abstain.
Ini nga mga tikang ang tuyo agud mapabaskog ang pagtipon sang mga ebidensya sa mga impeachment proceedings, ilabi na sa pagdeterminar sang dalagan sang kwarta nga may kaangtanan sa mga alegasyon sang wala mapaathag nga manggad. Kadungan sini, ginapabaskog man ang transparency kag accountability sa gobyerno.
