Wala sang may narekord nga insidente sang kalakasan sa ginpatigayon nga “Trillion Peso March” sa probinsya sang Capiz.
Sa interview sang Bombo Radyo kay Police Captain Merry Chris Dela Cruz, Public Information Officer sang CPPO, iya ginpahayag nga tatlo ka grupo halin sa nagkalain-lain nga sektor ang nag-upod sa hublag-protesta .
Ang mga grupo amo ang motor riders nga naglibot sa dalanon sang Roxas City, Makabayan Bloc nga ginabug-osan sang lima ka grupo nga nagpabutyag sang hibubun-ot sa Roxas City Plaza kag ang religious sector nga naghiwat sang Eucharistic adoration kag mga vigil sa tagsa ka simbahan.
Suno kay Dela Cruz, apisar makabig nga generally peaceful ang aktibidad kahapon ,nangin alerto ang kapulisan sa nagkalain-lain nga bahin sang syudad.
Dugang pa sang natungdan, nagapasalamat siya sa mga protesters sa pagpagwa sang ila mga sentimyento sa matawhay nga pamaagi amo man sa mga katapo sang kapulisan nga nangin aktibo sa pagpabilin sang kalinong kag katawhay sang palibot.
