Isa ka lalaki nga hubog kag may ‘hangover’ pa kag naka-tsinelas lang ang wala nag-atras sa dalagan nga may kalayuon nga walo ka kilometro sa isa ka fun run event sa Brazil.
Wala niya ginalauman ang nasambit nga karera ang magapabag-o sa dalagan sang iya nga kabuhi bilang isa ka homeless kag alcoholic.
Suno sa report, naka-livestream sa social media ang 8-km fun run nga gin-organize sang isa ka gym kag lokal nga gobyerno sang Garrafao do Norte, Brazil.
Sa video, makit-an nga pinasahi si Isaque dos Santos Pinho sa mga participants sa karera bangud sa iya nga suksok nga bayo kag itsura, kag wala siya sang number tag nga pamatuod nga kaupod siya sa event. Sang nag-signal na ang organizer nga umpisa na sang karera, nagkaripas ini gilayon sang dalagan apisar pa nga daw matumba na ini.
Sa umpisa, nahimo pa niya nga maunahan ang mga partisipante. Apang sang ulihi, naunahan siya sang mga runner nga nakasapatos kag yara sa kondisyon ang lawas.
Apang ginpabilib ni Pinho ang mga naglantaw bangud nahimo niya sa gihapon nga tapuson ang walo ka kilometro nga kalayuon sang dalagan.
Apisar indi tagpasakop si Pinho sa event, ginkilala sa gihapon sang mga organizer ang iya nga nahimo kag ginhatagan siya sang complementary medal.
Diri man nahibaluan sang mga tawo nga isa siya ka homeless. Suno sa iya, indi niya madumduman kun paano siya nakakadto sa event bangud sa iya nga kahulugbon.
Pahayag pa niya, nagdesisyon siya nga makidalagan bangud sa pagpati niya nga madula ang iya nga hangover kun balhason siya.
Matapos mag-viral kag mangin instant social media sensation si Pinho, may mga nag-donate sa iya sang sapatos, mga bayo kag iban pa nga running gears.
Ginbuligan man siya sang lokal nga gobyerno kag ginsabat ang iya nga training para makaintra siya sa iban pa nga karera.
Ngpromisa naman si Pinho nga talikuran niya na ang pag –inom sang alak kag seryosohon ang pagdalagan nga nagapabag-o sa dalagan sang kabuhi.
