ROXAS CITY, CAPIZ- Ginpatuman ang mas hugot nga pagbantay sa Truck Ban sa Capiz Bridge, Roxas City kasunod sang ginpaguha nga executive order ni Mayor Ronnie Dadivas nga nagadumili sang pag-agi sang mga dalagkuan kag may mabug-at nga karga nga truck sa amo nga taytay.
Sa interview sang Bombo Radyo kay Mr. Gonzalo Andrada, Head sang Traffic Management Unit (TMU)-Roxas City, ginpahayag nga ini nga ordinansa wala na bag-o kag madugay na dapat ginapatuman. Ginpabaskog lang subong ang implementasyon agud maproteksyunan ang istruktura sang taytay kag malikawan ang disgrasya.
Dugang pa ni Andrada nga ang mga traffic auxiliary may duty lamang tubtob alas 8 sang gab-i. Pagkatapos sini, ang pagbantay kag pagpatuman sang ordinansa igatugyan na sa mga kapulisan kag barangay tanod.
Nagpanawagan man si Andrada sa tanan nga drivers sang truck nga mangin responsable kag sundon ang ordinansa bangud ang ini nga layi para man sa seguridad sang tanan kag agud malikawan ang penalidad paagi sa pagsunod.
Samtang, ang mas hugot nga implementasyon sang truck ban isa ka tikang sang lokal nga gobyerno agud mapabilin nga luwas kag epektibo ang dalan sa syudad.
With a report from Bombo Jessa Mae De Los Santos
