ROXAS CITY – Gin-athag sang Presidente sang Hugpong Transport Capiz nga wala ini nagapamalabag sa modernization program sang gobyerno apang nagapanawagan ini nga kun mahimu indi lamang pag-iphase out ang mga daan nga salakyan bangud mahimu pa ini nga ma-upgrade kag ma-rehabilitate.
Ini ang ginpahayag ni Mr. Jobert Carandang sang ma-interview sang Bombo Radyo Roxas.
Suno kay Carandang nga sa Hunyo 30 sini nga tuig kuntani pagabawalan na nga makabiyahe ang mga jeep nga masobra sa 15 anyos apang gin-extend ini sang Department of Transportation sa tuig 2024.
Apang nagakabalaka naman ang mga transport sector bangud wala sila sang may ginauyatan nga dokumento nga nagapamatuod nga mahimu pa nga makabiyahe ang mga jeep nga masobra na 15 anyos bangud nakadepende pa sa Land Transportation Office kun hatagan sila sang rehistro nga makabiyahe.
Nagapanawagan si Carandang sa gobyerno nga indi masarangan sang mga jeepney operators kag drivers ang pagbakal sang mini bus nga masobra 2.3 milyones pesos ang balor sang isa ka unit.
Bangud diri nagapati si Carandang nga mahimu pa man nga ma-rehabilitate kag ma-upgrade ang salakyan kun ang problema lamang diri ang makina bangud luyag sang Department of Transportation (DOTr) nga Euro 4 ang makina sang salakyan.
Samtang ginpalab-ot naman ni Carandang ang ginpapanaog nga memorandum sa mga drivers nga obligado nga maggamit sang facemask bangud sang makamamatay nga 2019 Novel Coronavirus.
Gindugang pa sini nga ang mga drivers nga indi magsunod sa memorandum ang magapangatubang sang nagakaigo nga penalidad.
