ROXAS CITY – Ginpromesa ni National Capital Region Police Office (NCRPO) Chief Director Guillermo Eleazar sa pamilya sang ginpatay nga pulis nga tumandok sang Capiz nga mahatagan sang hustisya ang pagkamatay sini .
Sa interview sang Bombo Radyo Roxas kay Director Eleazar, ginpahayag sini nga indi mag-untat ang pulisya tobtob indi masulod sa bilangguan ang yara sa likod sang pagpatay kay PO2 Cris Robert Castro.
Padayon ang imbestigasyon sang Caloocan City police station sa pagpatay kay PO2 Castro sa diin tatlo ka persons of interest ang ginatutukan sa karon sang mga otoridad nga may kaangtanan sa iligal nga droga kag gun for hire.
Suno sa opisyal nga daku nga bagay ang pagkadula sa ila organisasyon ni Castro nga nahibaluan may maayo nga track record sa iya trabaho bilang alagad sang kasuguan.
Samtang indi lamang mapromesa ni Director Eleazar kun may reward money nga ihatag agud mapadasig ang pagpangita sa mga suspek, apang suno diri nga may reward money ukon wala, himoon nila ang tanan agud mahatagan sang hustisya ang pagpatay sa ila kaupdanan sa PNP.
