ROXAS CITY, CAPIZ- Ginkumpirmar sang mga otoridad nga may kaangtanan sa ‘gun for hire’ ang High Value Individual nga naaresto sa ginpatigayon nga drug buybust operation sang mga katapo sang Provincial Drug Enforcement Unit (PDEU)-Capiz sa Barangay Balijuagan, Roxas City.
Ang arestado amo si alyas “Ilong”, 31-anyos, warehouseman kag residente sang Sitio Pangpang, Barangay Bolo, sining syudad.
Sa interview sang Bombo Radyo kay Police Captain Gary Diaz, Team Leader sang Provincial Drug Enforcement Unit (PDEU), ginpahayag nga kalakip sa ila nga ‘under monitoring list’ sa ‘gun for hire group’ ang nasambit nga arestado.
Dugang pa sini, nga ang subject person ang ginakabig nga HVI indi lamang bangud sa balor sang druga nga nakumpiskar sa iya kundi isa pa ini ka courier sang ila nga grupo sa diin ginakuha sini ang supply sa Iloilo.
Madumduman nga nakuha sa paghinakop sini ang 22 tanan ka sachets sang ginapatihan shabu, nga ginbabulubanta may kabug-aton nga 150 gramos kag may Standard Drug price nga P1,020,000, buybust money nga nagabalor P10,000 sa diin P100 sini ang subscribed money, kag P9,900 ang counterfeited, isa ka transaparent medium plastic ziplock sachet, isa ka pouch nga nagaduag pula, kag isa ka unit sang motorsiklo.
Nagapangatubang sa kaso nga paglapas sa Republic Act 9165 ukon “Comprehensive Dangerous Drugs Act of 2002.”
Sa karon, nagapabilin ini sa kustodiya sang mga otoridad para sa nagakaigo nga disposisyon.
