Ginbuyagyag sang Department of Justice nga posible may iban pa nga mga bangkay nga ginpahayag ginhaboy sa iban nga bahin sang Taal Lake nga may kaangtanan sa iban pa nga kaso magluwas sa nadula nga mga sabungero.
Nagpaambit man si Justice Secretary Jesus Crispin Remulla nga may yara sila sang impormasyon nga ila ginatan-aw sa karon nga nagasiling nga ang iban sini nga mga bangkay mahimo nga may kaangtanan sa ‘war on drugs’.
Magluwas sa ground zero sang nagapadayon nga ‘search and retrieval operations’ sa Taal Lake, suno kay Secretary Remulla, may iban pa nga mga fishing grounds sa diin ginapatihan man nga ginhaboy ang mga bangkay.
Gin-anunsyo man sini nga ila ini gina-imbestigaran bangud lain ang natukiban diri sa ginapatigayon nga imbestigasyon angut sa pagkadula sang mga sabungero.
Samtang, angot sini, ginpakigbahin man ni Justice Secretary Remulla nga iya na ginmandu ang pagkutkot sang pila ka mga bangkay sa Batangas para sa eksaminasyon.
Ginpanindugan sini nga ini agud imbestigaran bangud wala pa sang pamilya ukon himata ang nag-claim sang mga bangkay nga natukiban sang 2020.
Magluwas sa mga nadula nga mga manugbulang, luyag man sang departamento nga maklaro ang pila pa ka mga kaso sang ‘disappearance’ lakip na ang tatlo ka mga bangkay nga ila na nakutkot.
Ginpahayag sini nga ginalakip man sang departamento ang imbestigasyon sa iban pa nga mga kaso sang pagkadula nga nakita nga may kaangtanan sa nagapadayon nga ‘war on drugs’.
Apang ginpasalig sini nga nakatutok sa gihapon sila sa nagapadayon nga imbestigasyon sa mga nadula nga mga manugbulang.
Bisan pa nga nakatutok ang Department of Justice sa imbestigasyon sa pagkadula sang mga drug dealers, ginhatagan pagtamod sang karon nga Secretary Remulla nga indi nila pag-ibaliwala ang posibilidad nga ang mga nadula nga mga manugbulang may kaangtanan sa nagligad nga ‘war on drugs.’
