Ginwestiyon sang IBON Foundation ang pagpasakop sang Pilipinas sa Pax Silica Initiative, nga suno sa grupo indi makahatag sang matuod nga industriyalisasyon sa pungsod.
Sa interview sang Bombo Radyo kay Sonny Africa, Executive Director sang IBON Foundation, iya ginpahayag nga indi sila kumbinsido nga ang amo nga inisyatibo makahatag sang padayon kag matuod nga pag-uswag sa industriya sang Pilipinas.
Ang Pax Silica Initiative amo ang isa ka outline para sa seguridad sa ekonomiya nga ginpangunahan sang Estados Unidos tinutuyo sini amo ang mapasangkad ang global supply chain para sa artificial intelligence (AI).
Lakip sa mga miyembro sini ang Pilipinas, Japan, Australia, kag South Korea.
Apang suno kay Africa, may posible nga negatibo ini nga epekto sa suplay sang tubig, kuryente, kag sa mga likas nga yaman sang pungsod.
Dugang pa sini, nga kinahanglan nga siguruhon sang gobyerno nga ang mga proyekto sa industriya ang magahatag sang matuod nga benepisyo sa publiko kag indi makaguba sa kalibutan.
