Nagapati ang IBON Foundation nga importante ang fraud audit nga himuon sang Commission on Audit (COA) agud madetermina ang matuod nga natabo sa confidential funds nga gingamit sang Office of the Vice President kag sang Department of Education.
Sa interview sang Bombo Radyo kay Mr. Sonny Africa, Executive Director, iya ginpahayag nga ang subong nga compliance audit amo ang nagatsekyar kun napasa bala ang mga required documents kag kun may yara sang kulang, magapabilin sa gihapon nga wala sang sabat ang tuhoy sa paggamit sang pondo.
Apang kun fraud audit ang gamiton suno sa iya, magapangita mismo ang auditors sang aktwal nga ebidensya agud madetermina kun sa diin gingamit ang kwarta kag conclusive ang findings sini kun ipaanggid sa compliance audit.
Ginkwestyon man ni Africa ang kadugayon sang pagpatuman sang fraud audit nga nagapakita lamang nga mahina ang anti-corruption system sang pungsod.
