Ang tattoo ang ginakabig nga art. Apang kun ibutang mo na ini sa sapat, lain na ina nga istorya.
Didto sa Shanghai, China, nag-angkon sang pagpakamalaot sa mga animal lover ang mga litrato sang isa ka hairless dog nga may tattoo sa bug-os sini nga likod.
Ang ido ang isa sa mga ginbida sa 27th Asian Pet Show. Ginpabugal pa sang tag-iya ang iya ido nga isa ka Mexican hairless dog kag ang Yakuza-style tattoo sini.
Suno sa iya, indi na kinahanglan sang anesthesia sang ido bangud may mataas ini nga tolerance sa sakit.
Ang insidente ang ginkaakig sang madamo nga mga animal lover.
Labi nga nag-ibwal ang kontrobersiya sang nagguwa ang report nga ginaalegar nagtanyag pa ang tag-iya sang serbisyo sa pag-tattoo sa iban nga mga ido sa balor nga 2,000 tubtub 3,000 yuan ukon P16,000 tubtub P24,000.
Ang insidente nagbukas sang isa ka seryoso nga paghinun-anon nahanungod sa animal welfare kag ang limitasyon sa pag-treat sa mga hinuptanan nga indi dapat paghimuon nga dekorasyon.
