Magasugod na ang Atin Ito Coalition sang ila ikatatlo nga sibilyan nga misyon sa West Philippine Sea sumugod sa Lunes, Mayo 26 tubtob Mayo 30.
Ini ang ginpahayag nanday Atin Ito Coalition Convenors Ed Dela Torre kag Akbayan party president and mission commander Rafaela David kahapon nga adlaw, Huwebes, Mayo 22.
Ang una nga konsyerto sang WPS para sa kalinungan kag paghiliusa ang pagahiwaton sa nasambit nga misyon sibilyan, nga magalakip sang mga kilala nga Pilipino kag internasyonal nga mga artista.
Magluwas sa sunset musical event nga pagahiwaton sa El Nido, Palawan, ginpahayag ni David nga may yara man sang dialogue sessions, cultural exchanges kag concert performances sa exclusive economic zone (EEZ) malapit sa isla sang Pag-asa.
Ang mga artista, musikero, mangingisda, kag mga lider sang katilingban sibil gikan sa Pilipinas kag kaiping nga mga pungsod magatingob sa pagpasanyog sang kalinong, dayalogo, kag pagbayluhanay sang kultura.
Base sa schedule nga ginpresentar ni David sa media, ang sibilyan nga barko nga T/S Felix Oca ang magasugod sa biyahe gikan sa Manila padulong sa El Nido, Palawan takna alas 6 sang aga sa Domingo, Mayo 25.
Ginalauman nga magaabot ini sa masunod nga adlaw kag ang mga artista nga magapakigbahin sa konsyerto ginalauman nga magaabot sa hapon.
Pila sa ginalauman nga mga performers sa peace concert sa El Nido amo ang Filipino musical artist nga sanday Noel Cabangon, Ebe Dancel, rock band Rouge, P-pop group nga HORIZON kag iban pa samtang ginalauman man ang mga international performers kaangay sang Japanese artist nga si Fumi, Indonesian kag Malaysian singers Viona kag Kai Mata kag South Korean girl group nga I: Mond.
Samtang, nagakoordinar man ang koalisyon sa gobyerno sang Pilipinas kag coast guard agud mamonitor ang civilian mission gikan sa luwas nga distansya.
