ROXAS CITY – Nag-negatibo na sa coronavirus disease (COVID-19) ang ikaanom nga COVID-19 patient sa probinsiya sang Capiz.
Ini ang sandig sa ginpaguwa nga official statement sang Capiz Provincial Health Office (PHO).
Mahibaluan nga nag-negatibo sa SARS-CoV-2 (causative agent sang COVID-19) sang makaduha ka beses ang 32 anyos nga lalaki nga residente sang Barangay Milibili, Roxas City gamit ang Real Time-Polymerase Chain Reaction (RT-PCR) test.
Base ini sa Official Laboratory Test results nga ginpaguwa sadtong Mayo 25 kag Hunyo 1, 2020 sang Western Visayas Medical Center, Department of Pathology, Sub-National Laboratory.
Natalana subong, Hunyo 2, ma-discharge ang nasambit nga pasyente sa Roxas Memorial Provincial Hospital, ang designated Provincial COVID-19 Facility.
Sa pihak sini magapaidalom sa gihapon sa Strict Home Quarantine sa sulod sang 14 diyas ang nasambit nga pasyente kag ipaidalom liwat sa swab test.
