Nagapangatubang sa Ika-apat na nga Impeachment Complaint si Vice President Sara Duterte matapos nga gin-file ni Atty. Nathaniel Cabrera ang reklamo sa Office of the House Secretary General.
May kaangtanan ini sa culpable violation of the Constitution, betrayal of public trust, graft and corruption, kag iban pa nga mataas nga krimen nga gina-alegar ginhimo ni Duterte.
Ginpasaka ang reklamo pila ka oras matapos gin-anunsyo sang Bise Presidente ang iya tuyo nga magpapili sa pagka-presidente sa 2028 national elections.
Ang ika-apat nga reklamo ang gin-endorso nanday House Deputy Speaker Francisco Paolo Ortega V kag Manila 6th District Representative Bienvenido Abante Jr.
Suno sa reklamo, ginalakipan sang mga isyu ang una nga pahayag ni Duterte nga nag-hire siya sang assassin agud patyon ang Presidente, ang First Lady, kag si anay House Speaker Martin Romualdez.
Sa pihak nga bahin, ginpahayag sang kampo ni Duterte sang Miyerkules sang gab-i nga nakabaton sila sang impormasyon angut sa pagpasaka sang ika-apat nga reklamo sa impeachment.
Samtang, pending pa sa opisina sang House Speaker ang una nga tatlo ka impeachment complaints batok kay Duterte.
Suno kay House Senior Deputy Majority Leader Lorenz Defensor, tubtob sa Marso 2 ang tion sang House Speaker agud ilakip ang mga reklamo sa House plenary’s order of business.
Sa tion nga malakip, ang mga reklamo ang iga-refer sa House Committee on Justice agud pormal nga umpisahan ang impeachment proceedings batuk sa Bise Presidente.
