ROXAS CITY – Ginkompirmar sang Municipal Health Officer sang banwa sang Cuartero nga nagpaidalom lamang sa 14-day strict-home quarantine ang isa nila ka Locally-Stranded Individual (LSI) nga sang ulihi nag-positibo sa coronavirus disease (COVID-19).
Suno kay Dr. Winfred Rivera, ang nasambit nga pasyente ang naga-edad sang 30 anyos kag naghalin sa Sta. Maria, Bulacan kag nakapauli sa amo nga banwa sang Hunyo 27.
Ginpahayag ni Rivera nga sang nakaabot sa ila banwa, gilayon nga gindul-ong ang amo nga pasyente sa ila balay.
Base sa monitoring sang Barangay Health Emergency Response Team (BHERT), wala man nakaguwa sa ila balay ang amo nga pasyente samtang ginahulat ang iya nga swab results.
Ginakabig nga ‘asymptomatic’ case ang amo nga pasyente ukon wala sang anuman nga sintomas sang nasambit nga sakit.
Sa karon suno kay Rivera, yara na sa municipal quarantine facility sang nasambit nga banwa ang amo nga pasyente kag gilayon man ginpatigayon ang contact-tracing sang mga otoridad.
Mahibaluan nga Hulyo 20, Lunes nga adlaw, nagguwa sa datos sang Department of Health (DOH) nga nag-positibo ang amo nga pasyente sa COVID-19.
Matandaan nga una na nga naka-rekord ang nasambit nga banwa sang kaso sang nasambit nga balatian sadtong Hunyo 20, 2020 nga amo ang isa ka 33 anyos nga babaye nga nagabusong kag isa ka Returning Overseas Filipino (ROF).
Ini ang naghalin sa Dubai kag nag-abot sa Metro Manila sadtong Hunyo 8 kun sa diin ginpaidalom ini sa real-time polymerase chain reaction (RT-PCR) test sa amo man nga adlaw kag nagguwa nga negatibo sa nasambit nga balatian pagka-Hunyo 12 rason nga nakapauli ini sa Capiz sadtong Hunyo 13.
Hunyo 15 sang ginpaidalom ini liwat sa RT-PCR test apang nagguwa sa resulta nga positibo ini sa amo nga balatian pagka-Hunyo 20.
Ginakabig ini nga ‘asymptomatic’ case ukon wala man nakitaan sang anuman nga sintomas kag ginkompirmar ni Rivera nga dalayon na ini nga naka-rekober.
