ROXAS CITY – Kadungan sang ikaapat nga State of the Nation Address ni Presidente Rodrigo Duterte, nagpatigayon man sang hublag-protesta ang nagkalain-lain nga militante nga grupo sa probinsiya sang Capiz.
Sa interview sang Bombo Radyo Roxas kay Bryan Bosque, deputy spokesperson sang grupo nga Bayan-Panay, ginpahayag sini nga nagtililipon ang nagkalain-lain nga sektor agud mapalab-ot sa gobyerno ang kapalpakan sini nga mapaumwad ang ila nga kabuhi.
Gintawag pa sini nga ‘kabutigan’ kag ‘pa-pogi points’ lamang ang naging mensahe sang presidente sa iya nga SONA.
Nagsugod suno sa iya ang ila nga aktibidad sa isa ka martsa-protesta kag ginsundan sang malip-ot nga programa nga ginpatigayon sa Roxas City Public Plaza.
Ang nasambit nga hublag-protesta ang gin-updan sang grupo nga Tumandok, Kahublagan sang mga Mangunguma sa Capiz (KAMACA), Gabriela, Kabataan, ACT-Teachers, Bayan-Panay kag iban pa.
