TAPAZ, CAPIZ – Nadakpan ang iligal nga pagpatigayon sang bulangan sa banwa sang Tapaz, Capiz.
Ang ang ilegal nga pagbulang ang gina-facilitate ni alyas Chard, 46 anyos, kag residente sang Barangay Taft, Tapaz, Capiz.
Sandig sa imbestigasyon sang Tapaz Municipal Police Station, nakabaton sang Intel Report gikan sa isa ka confidential informant nga may yara sang iligal nga bulang sa lugar nga gilayon man nga ginpadulungan sang mga kapulisan apang wala na ang mga manugbulang, kag lunsay mga gamit na lang ang nabilin.
Nakumpiska sa lugar ang mga patay kag buhi nga manok nga gina bulang kag pila ka mga gamit nga ginagamit sa amo nga aktibidad.
Sa subong, nagapadayon ang imbestigasyon sang mga otoridad sa pagpangita sang mga involved sa amo nga iligal nga pagbulang kag pagapasakaan sang nagakaigo nga kaso.
