ROXAS CITY – Nagpalab-ot sang pagkadismaya ang isa ka iloy matapos nga ginkakas ang pangalan sang iya bana sa listahan sang mga benepisaryo sang Pantawid Pamilyang Pilipino Program (4PS).
Sa pakig-angut sang Bombo Radyo kay Marilou Felasol, residente sang Barangay Agsur, banwa sang Sapian, ginsiling sini nga may mga kabataan pa ini nga naga-eskwela sa elementarya kag high school.
Mabudlay para sa ila nga sustentuhan ang pag-eskwela sang ila kabataan bangud wala sila sang maayo nga pangabuhianan.
Madugay naman suno diri ini nga benepisaryo sang 4Ps sumugod pa sang tuig 2011.
Ba-se sa pagsaysay ni Felasol, ginpaathagan naman ini sang katapo sang DSWD nga nagaguwa sa ila survey, nga yara na sila sa Level 3 nga estado sang pagpangabuhi ukon amat-amat na nga nakatibawas sa kaimulon kag may yara na sang graduate nga kabataan nga sarang makabulig sa ila.
Mahibaluan nga mamumugon ang bana ni Felasol kag anay OFW ini apang wala na ini nakabalik sumugod sang pandemya.
Nagapanawagan naman ini sa natungdan nga ikonsiderar ang ila sitwasyon kag kun mahimo ihatag sa ila ang para sa subong nga quarter.
