Ginpa-bombo sang isa ka iloy ang pila ka Persons Deprived of Liberty (PDL) nga ginaalegar nagkastigo sa iya anak sa sulod sang Bureau of Jail Management and Penology (BJMP) sa Barangay San Jose, Roxas City.
Ang PDL amo si alyas Marmar kag pumuluyo sang Barangay Banica, Roxas City.
Sa interview sang Bombo Radyo kay Magdalena Romero, iloy sang ginaalegar ginkastigo nga PDL, iya ginpahayag nga nakabaton ini sang tawag nagikan sa katapo sang BJMP nga gindala sa ospital ang iya anak kag gilayon man nila nga ginkadtuan
Suno kay Romero, duha pa lang ka bulan ang iya anak nga napreso sa selda tres sang BJMP.
Pahayag niya, ginaalegar nagasugal ang mga PDL sa sulod kag sa tunga sang paghampang ginpatu-patuan ang iya anak nga nagdinaya bangud sa nahulog nga baraha.
Bangud sini, ginaalegar ginpulihan si Marmar sang sumbag sang ginabanta apat ka mga PDL tubtob siya ang nalipong.
Nakaangkon sang nagkalain-lain nga pilas sa lawas si Marmar pagkatapos ini ginkastigo.
Sa subong, padayon nga nagapaayo sa ospital ang PDL samtang naga-imbestigar ang mga kapulisan.
Dugang pa sang natungdan, ginpabalhag na sang ila pamilya ang natabo sa Roxas City Component Police Station kag handa nga magpasaka sang kaso sa mga nagsakit sa iya anak.
