ROXAS CITY – Hustisya ang ginasinggitan sang pamilya ni William Barrera, 37-anyos kag mangunguma matapos ginluthang-patay ini sang wala pa makilan-an nga mga persona sa Sitio Caningag, Brgy. Jolongajog banwa sang Pontevedra alas 12:30 kaina sang kaaganhon.
Sa interview sang Bombo Radyo kay Mrs. Estelita “Bebe” Barrera, iloy sang biktima, iya ginpahayag nga may ginadudahan na siya nga may kahimuan sa pagpatay sa iya bata apang ginpakamaayo sini nga indi na pag-ipakigbahin kag ang kapulisan na lamang ang maghawid sang imbestigasyon.
Ginsaysay ni nanay Estelita nga alas 7:00 kahapon sang gab-i sang naglakat ang iya bata nga si William kaupod ang 13-anyos nga subang nga bata sini kag abyan sang biktima nga si alyas “Richard”, sa legal nga pang-edaron padulong sa isa ka balay ilimnan sa bahin sang Brgy. Bailan.
Ginsiling sang iya apo suno diri nga nag-order si alyas “Richard” sang ilimnon kag sigarilyo sa nasambit nga lugar apang wala ini sang inugbayad sang ginsukot na rason nga ang 13-anyos nga bata sang biktima ang nagbayad.
Ginpaathag ni nanay Estelita nga wala nag-inom ang iya apo kag nag-upod lamang bangud siya ang nakahibalo magmaneho sang motorsiklo, nagpauli na ang mga ini pasado alas 11:00 sang gab-i kun sa diin kaupod sa motorsiklo nga ginamaneho sang menor de edad si Richard.
Samtang ginpakamaayo naman ni William nga sa abyan sini nga si alyas “Toni” magsakay papuli bangud may sidecar ang motorsiklo sini nga naglabay sa balay ilimnan.
Isahanon naman suno diri nga nagpanglakaton ang biktima sa uyapad padulong sa ila balay matapos magpanaog sa bahin sang karsada kag ginsibinan pa sang iya bata nga lalaki antes natulugan sa sala.
Apang, sang tulog na ang tanan ginkakibot na lamang sang iloy kag iban pa nga himata ang lupok nga ila nabatian kun sa diin hinali naman nga nagpadulong ang iya apo sa ila balay kag ginsiling nabudlayan magginhawa ang iya amay.
Gilayon naman nga nagkadto si nanay Estelita sa kaiping nga balay sa iya bata kag diri nasaksihan nga nagalagas na sang pagginhawa si William kag kasubong may luyag ini ihambal bangud nagbuka pa ang baba sini kag nagtulo pa ang luha.
Pahayag sang iloy nga masakit sa iya ang natabo sa iya bata bangud wala man ini rekord sa barangay ukon may nakaaway kag wala sila sang makita nga motibo para patyon ini sang brutal.
Dugang pa sini nga luyag niya makita ang duha ka kaupdanan sang biktima kagab-i nga si alyas “Richard kag “Toni” bangud tubtob sa karon wala pa ang mga ini gapakita apisar naglapta na sa ila barangay ang nagluntad nga insidente.
