ROXAS CITY-Indi makapati ang iloy sang lalaki nga nasapwan nga patay sa waiting shed sang Barangay Agbabadiang sa banwa sang Panitan kaina sang aga nga ini ang madangatan sang iya anak.
Sa exclusive interview sang Bombo Radyo kay Mrs. Remy Cabalo, iloy ni Glen Cabalo, ginpahayag sini nga wala gid magsulod sa ila pinsar nga ang ginbalita nga nasapwan nga lalaki amo ang iya anak.
Ba-se sa panaysayon sang ginang alas 8 kagab-I sang nagpauli sa ila balay sang asawa ang biktima.
Nagakatulog na sila sang nagring ang cellphone kag naglisensiya sa asawa nga sabton ang tawag sang iya abyan.
Wala na nakabalik pa sa ila balay si Glen kagab-I apang wala man nagkabalaka ang iya tiayon bangud nagdumdum naman ini nga sa balay sang iya iloy sa Philippine Railway St., Roxas City ini nagtulog.
Nakibot na lamang sila sang gintundaan nga patay na ang biktima.
Aminado ang ginang nga sadto nadalahig gid man sa iligal nga buluhaton ang anak, apang gindismiss man ang iya kaso kag nakaguwa ini.
Sa pagkamatood nga nakita sini ang pagbag-o sa iya anak sa diin nagatrabaho na ini para mabuhi ang pamilya.
Gintuad sang iloy nga nakamuno na sadto sa iya ang biktima nga may death threat ini nga nabaton, apang sang iya ini ginsablaw, naghipos na lamang ini.
Wala sila sang ideya kun may kaaway ang iya anak nga amo ang gintunaan sang pagluthang patay sa biktima.
Apang nag-apelar ini sa suspek ukon mga suspek nga yara sa likod sang krimen nga makunsensiya sila kag kuntani magsungka na lamang.
