ROXAS CITY – Palamangkutanon sa pamilya sang 24-anyos nga pulis nga tumandok sang Capiz kag na-assign sa 1st Negros Occidental Police Mobile Force (NOCPFMC) sa syudad sang Escalante, ang rason kun matood nga nagpanginmatay ang ila himata.
Suno kay Mrs. Alicia Villasis, 68-anyos kag iloy sang biktima nga si Patrolman Richard Villasis sang Barangay Jaena Norte, Jamindan, wala ini nagapati nga nagsuicide ang iya nga anak, bangud wala ini sang nahibaluan nga motibo para himoon ini sang hinipo nga anak.
Wala man sang kamatuoran ang alegasyon nga na-depress ang biktima matapos mahibaluan nga may ginasuprer nga balatian ang iloy.
Nagapanindugan ang ginang nga indi malubha ang iya nga sakit para magkabalaka sa iya nga ikaayong lawas ang anak.
Nahibaluan nga gin-updan pa sang biktima ang iloy nga nagpa-check up sa doktor sang nagpauli ini para sa iya bakasyon sang nagligad nga bulan sang Mayo.
Apang masami ini nga ginapahanumdum sang anak nga maghalong kag indi magpakapoy.
Samtang aminado si Mrs. Villasis nga siya ang katapusan nga nakahibalo nga may malain nga natabo sa anak, matapos nga indi na maagwantahan sang isa ka anak nga itago ang pagkamatay ni Patrolman Villasis sa sulod sang barracks sang 1st Negros Occidental Police Mobile Force sa Escalante City, Negros Occidental.
Nahibaluan nga hinipo sa pito ka mag-utod si Patrolman Villasis sa diin ini ang nagahatag sang sustento sa iloy kada bulan.
