ROXAS CITY, CAPIZ- Nagapadayon ang imbestigasyon sang mga katapo sang Bureau of Fire Protection Roxas City, sa sunog nga nagluntad sa Sitio San Juan, Barangay Baybay kag San Roque Street, Barangay II, Roxas City sang gab-i sang Nobyembre 25, 2025.
Ang tag-iya sang puluy-an nga nasunog sa Baybay amo si Reynald Mina samtang wala na ginhingadlan pa ang isa ka border sang apartment nga nasunog sa Barangay II.
Sa interview sang Bombo Radyo kay Senior Fire Officer 1 Junemar Galve, Chief Public Information Officer sang Bureau of Fire Protection Roxas City, iya ginpahayag nga wala pa sa gihapon natumod ang gintunaan sang amo nga mga sunog.
Suno kay Galve, maswerte nalamang man nga wala sang may dako gid nga halit sa tawo ang ginbilin sang amo nga sunog.
Apang, nag-angkon sang pilas sa tiil matapos nga natunok sang lansang ang tag-iya sang puluy-an nga nasunog sa baybay.
Naglab-ot naman sa mas ukon menos P3, 150 ang halit sang nasunog nga puluy-an sa Baybay nga human sa light materials, kag yara naman sa mas ukon menos P45, 600 ang halit nga ginbilin sa nasunog nga apartment sa Barangay II.
Nagpanawagan naman ang natungdan sa publiko, nga magpabilin nga aligmat kag permi nga siguraduhon nga wala na sang kalayo sa dapog, kag mga kagamitan nga nakapangsaksak nga mahimo magtuga sang kalayo agud makalikaw sa sunog.
Interviewed by Bombo Jessa Mae De Los Santos
