MAAYON, CAPIZ- Nagapadayon ang imbestigasyon sang mga katapo sang Maayon Municipal Police Station natuhoy sa ginapahayag pagpanghold-up sa isa ka Barangay Power Association (BAPA) collector sa Barangay Batabat, Maayon, Capiz.
Ang biktima amo si Maricel Felipe Distor, 49 anyos kag residente sang Barangay East Villaflores sa amo man nga banwa.
Sa interview sang Bombo Radyo kay Police Captain Danilo Lauron, Hepe sang Maayon Municipal Police Station, iya ginpahayag nga sandig sa panaysayon sang biktima, hinali nalang ini sila nga ginbalabagan sang duha ka mga persona nga nakasakay sa itom nga raider nga motorsiklo kag ginhold-up.
Suno kay Lauron, natabo ang insidente sang tinalikdan nga Disyembre 5, takna las 9:40 sang aga sa nasambit nga lugar sa diin nga kaupod man sang biktima ang iya sini nga asawa.
Pahayag niya, mapadulong kuntani ang mag-asawa sa Barangay Timpas, Panitan agud nga idu-ong ang bayad sa kuryente sang natabo ang amo nga insidente.
Nahibaluan nga natigayon nga nataban sang mga suspetsado ang P100,000 nga balor sang kwarta halin sa biktima.
Nagpahunumdom naman ang natungdan sa publiko nga kun may dala nga kwarta, siguraduhon nga i-secure ini kag kun may makaduluda nga nagasunod, magpondo anay sa isa ka lugar nga madamo sang tawo agud makalikaw sa kasubong nga insidente.
Interviewed by Bombo Jessa Mae De Los Santos
