Nagapati ang simbahang katolika nga isa ka political process ang impeachment complaint batok sa mga mataas nga mga lider sa pungsod.
Sa interview sang Bombo Radyo kay Msgr. Meliton Oso, Director sang Jaro Archdiocesan Social Action Center, iya ginpahayag nga posible mabasura ang impeachment complaint batuk kay President Ferdinand Marcos Jr., bangud madamo sini sang kaalyado sa Kamara.
Sa natabo naman nga impeachment complaint batuk kay Vice President Sara Duterte sang nagligad nga tuig, apisar nagsaka ini sa Senado, wala man ini nangin madinalag-on bangud may mga kaalyado man ini nga mga senador tubtob nga naguwa ang desisyon sang Korte Suprema nga nagadeklara nga ‘unconstitutional’ ang impeachment batuk sa bise presidente bangud sa one year bar rule.
Suno kay Oso, dapat may kahadlok sa Diyos kag may konsensya ang mga lider sang pungsod sa diin indi sila dapat mangin selfish ukon magpangabuhi sa luho, bangud sila ang alagad sang katawhan.
Gin-athag man sang natungdan nga ang public servant dapat accountable sa tanan, kag kun indi na matuman ang responsiblidad, mas maayo pa nga maghalin na lang sa pwesto.
Nagpahanumdon man ini sa tanan nga pumuluyo nga indi madulaan sang paglaum sa kamatuoran kag hustisya, bangud ang ang Simbahang katolika yara masami naga-upod sa insakto kag sa kamatuoran.
