Ginpanindugan ni Partido Demokratiko Pilipino-Lakas ng Bayan (PDA-LABAN) impeachment spokesperson Atty. Ferdinand Topacio nga indi pwede matabo ang recusal sang senator-judges sa impeachment ni VP Sara Duterte bangud sa isyu sang political affiliation.
Suno sa abogado nga indi madula ang kamatuoran nga ang proseso sang impeachment isa ka proseso sang pulitika ukon may yara sang political taint.
Suno sa iya, kun mapilitan ang iban nga mga senador nga mag-recuse ukon indi mag-intra sa hitabo nga mag-abante ang trial, bangud sa ila political affiliation kag political party, sigurado suno sa iya nga wala na sang mabilin nga senador nga magaserbe bilang judge.
Ang kada isa sa mga senador suno sa iya, may kaugalingon nga political affiliation, umpisa nga nagdalagan sila sa pulitika.
Dugang pa niya, indi husto nga pangabayon nga indi magpasakop ang mga senador nga kaalyado sang bise presidente kag pasugtan lamang nga magpasakop ang mga senador nga hayag nga nagapakamalaut ukon nagapakalain sa iya.
Gin-ehemplo man sang abogado ang mga senador nga may koneksyon sa mga kongresista nga nagpirma kag nagsulong sang impeachment complaint batuk sa bise presidente.
Gin-maintain man sang abogado nga kinahanglan anay hibaluon sang ika-20 nga kongreso kon ini ang may hurisdiksyon sa impeachment complaint batuk kay VP Sara antes padayunon ang hearing sang nasambit nga reklamo.
Sa pagbalikid, ang kaangay nga reklamo ginpasaka sa ika-19 nga kongreso kag isa sa mayor nga pamangkot subong amo kon bala ang masunod nga kongreso may hurisdiksyon sa pagpadayon kag sa katapusan pamatian ang kaso sang bise presidente.
