Nagpagwa sang direktiba si Agriculture Secretary Francisco Tiu Laurel Jr. sa mga opisyales sang Department of Agriculture (DA) nga mapadasig ang pagpatuman sang mga importante nga proyekto sang Departamento kag masiguro ang aktwal nga pag-release sang ila pondo.
Ang nasambit nga mandu ang gin-issue sang tiglikom kadungan sang pagsinapol sang DA Management Committee (ManCom) nga ginhiwat sang katapusan sang Abril.
Pila sa mga gintumod ni Tiu Laurel nga kinahanglan hatagan sang gilayon nga resulta amo ang P20/kilo nga bugas, ang pagtukod sang cold storage facilities, ang mga tikang sa pagpasimple sang mga guidelines para sa Daily Price Index nga importante sa pagpatuman sang Anti-Agricultural Economic Sabotage law, kag fine-tuning sang mga suhestyon nga nagasanto sa bag-o nga procurement law.
Ginpanindugan sini nga dapat unahon ang pinakaimportante nga mga proyekto agud masigurado nga madeliver ini sa husto nga tion kag matuman ang gintalana sang Kongreso.
Magluwas sa inisyatibo sang bugas, ginhatagan pagtamod ni Tiu Laurel ang kinahanglanon nga padasigon ang pagtukod sang cold storage facilities kag siguraduhon nga ang tanan nga ginaproponer nga proyekto nagasunod sa bag-o nga procurement regulation. Ginhatagan man niya sang importansya ang pagpatuman sang Daily Price Index agud ma-establisar ang presyo sang agrikultura bilang kabahin sang Anti-Agricultural Economic Sabotage Law.
Magluwas sa panawagan nga padasigon ang mga programa, ginpahayag man ni Tiu Laurel nga nakatutok man ini sa pagpabaskog sang internal performance evaluation system sang ahensya.
