Temporaryo nga maga-untat sa pag-import ang Pilipinas sang mga animal products nga nagikan sa Germany.
Sa isa ka statement ginsiling sang Department of Agriculture (DA) nga ang temporary ban sa pag-import sang mga produkto nagikan sa mga sapat nga madali malatnan sang foot-and-mouth disease (FMD) nagikan sa Germany kadungan sang napahayag nga outbreaks sang highly contagious virus nga nakaapekto sa cloven-hoofed livestock.
Ang importation ban ang kaungdan sang DA Memorandum Order 8 nga ginisyu sadtong Pebrero 10, 2025.
Suno sa ahensya nga sadtong Enero 10 ginpahibalo sang Germany sa World Organization for Animal Health (WOAH) ang kumpirmado nga FMD cases sa domestic buffaloes sa munisipalidad sang Hoppegarten, nga makit-an sa distrito sang Märkisch-Oderland, Brandenburg.
Base sa mandato ginsiling ni Agriculture Secretary Francisco Tiu Laurel Jr. nga magapabilin ang import ban tubtob wala ginabawi sang Germany ang FMD-free status sini nagikan sa WOAH.
Ginmando man ni Tiu Laurel ang suspensiyon sa pag-isyu sang sanitary and phytosanitary import clearances.
Samtang, pagatugutan naman ang mga produkto nga yara na sa biyahe ukon ang mga ginbaton sa port antes ang pagpatuman sang ban apang siguraduhon nga nagikan ang mga ini sa mga sapat nga ginpatay antes ang Disyembre 6, 2024.
Mahibaluan nga ang FMD isa ka highly contagious viral infection nga nagapanguna nga nakaapekto sa mga sapat ilabi na ang baka.
Ang iban pa nga cloven-hoofed animals, kalakip ang mga baboy, karnero, kanding, kag karabaw madali man nga latnan sang FMD.
Matandaan nga sadtong tinalikdan nga tuig, ang Pilipinas nag-import sang 3,177.5 metric tons sang karne nga baka nagikan sa Germany, kung sa diin ginakabug-usan sang ginabulubanta 0.5% nga total beef imports sang pungsod. Ang Germany ang ginakuhaan man sang pungsod sang baboy tubtob sadtong 2020 sang magpatuman ang DA sang separado nga ban bangud sa outbreak sang African Swine Fever sa Germany.
