Ginkakas na sang Pilipinas ang ban sa pag-import sang domestic kag wild birds, kalakip ang poultry products, nagikan sa Denmark, halos duha ka tuig matapos ginpatuman ang direktiba.
Suno sa Department of Agriculture (DA), ginpaguha ni Secretary Francisco Tiu Laurel Jr. ang Memorandum Order. No. 50 nga nagkaka sa temporary import ban nga una na ginpatuman sadtong Disyembre 2022.
Ini matapos ginpahibalo sang Danish Veterinary and Food Administration sa World Organization for Animal Health nga ang tanan nga kaso sang highly pathogenic avian influenza sa European country naresolba na kag wala na sang dugang nga outbreaks nga ginpahayag sumugod Setyember 12, 2024.
Sakop sang import ban ang domestic kag wild birds subong man ang mga produkto, kalakip na ang poultry meat, day-old chicks, eggs, kag semen, nga ginpatuman kadungan sang mga report sang avian flu outbreak sa Denmark.
Pahayag sang ahensya nga tinutuyo sini agud malikawan nga malatnan kag maprotektahan ang mga consumer kag local poultry industry.
Samtang gilayon naman nga ginpatuman suno kay Laurel ang ulihi nga mandato apang ginpahayag nga ang tanan nga import transactions kinahanglan magsunod sa mga regulasyon kag pagsulundan may kaangtanan sa agricultural food imports.
