ROXAS CITY – Nangin grandioso ang inagurasyon sang bag-o nga gobernador sang probinsiya sang Capiz sa Capiz Gymnasium sa Villareal stadium.
Gintambungan ang kahiwatan sang mga opisyales sang gobyerno probinsiyal humalin sa mga board members, department heads sa kapitolyo probinsiyal kag ahensiya sang gobyerno, alkalde sa kabanwahanan, PNP, AFP, pamilya Contreras, dinapit nga mga bisita, Roxas City Mayor Ronnie Dadivas kag madamo nga iban pa.
Ginpangunahan ni 1-PACMAN Congressman Mikee Romeo ang pag-administer sa pagtake oath ni Governor Esteban Evan Nonoy Contreras.
Sa nasambit man nga okasyon kasubong nangin reunion ini sang mga anay gobernador sang probinsiya nga sanday Ting Borda, Esteban Evan Dodoy Contreras, Victor Tanco Sr., kag Vicente Bermejo nga nagpakita sang ila suporta sa bag-o nga gobernador.
Samtang kalakip sa inaugural speech ni Governor Esteban Evan Nonoy Contreras ang 6 point agenda sang iya nga administrasyon nga mangin giya sini agud mahatagan katumanan ang iya plano para sa probinsiya kag mga Capizeño.
Kalakip diri ang karsada ukon infrastructure, ikaayong lawas ukon health, palangabuy-anan ukon livelihood, edukasyon ukon education, pag-amlig sa palibot ukon environment kag kalinong kag katawhay ukon peace and order.
Ginpasiguro man sini nga isa ka matood nga gobyerno ang iya administrasyon nga maga-alalay sa tanan nga oras sa mga Capizeño.
Naaad pa sa mensahe ni Contreras nga ang mga Capizeño amo ang iya nga kusog kag ang ila handum amo ang iya giya samtang ang buwas damlag naman sang tanan amo ang iya nga inspirasyon.
Ginpalab-ot man sini sa iya mga kritiko kag kasumpong sa pulitika nga panahon na agud ilubong sa limot ang ila indi pag-intiendihanay sang nagligad nga eleksyon bangud makasalig ang mga pumuluyo nga mangin transparent ang iya nga administrasyon.
Ginapanindugan sini nga indi niya mahatagan katumanan ang iya dalamguhanon para sa mga Capizeño kun wala sang kooperasyon sang mga pumuluyo.
