ROXAS CITY — Na
kaagaw sa atensiyon ni Department of Agriculture Sec. Emmanuel “Manny” Piñol ang wala mahuman nga tulay nga nagasugpon kuntani sa banwa sang Sigma kag Mambusao, Capiz.
Sa Facebook post sang tiglikom nga iya gintig-ulohan:’THE INCREDIBLE CASE OF A BRIDGE WITHOUT A RIVER’ suno sa iya nga padulong siya sa banwa sang Sigma para sa Biyaheng Bukid Forum sang iya nakita ang ginlaragway sini isa ka monumento sang pagwaldas sang pondo sang gobyerno.
Ginatumod ni Piñol ang wala mahuman nga tulay nga nagaangot sa Barangay Tawog, Sigma kag Barangay Tugas, Mambusao nga suno sa iya, indi lamang kaangay sang tore bangud sa kataason sini kundi wala pa ini sang suba nga ginatulayan.
Nanutaran man niya ang isa ka magamay nga kanal sa kilid sang tulay nga suno sa iya ang sarang man nga mapahamtangan sang box culvert ukon tamburong.
Nagaduda man siya nga magamit pa ang amo nga tulay bangud sa kataason sini.
Ginpahayag pa ni Piñol nga suno kay Mayor Christopher Andaya sang Sigma, wala lamang nagaisahanon ini nga tulay nga ginpondohan sang pila ka milyon apang wala man mapuslan.
Samtang aminado naman ang tiglikom nga madamo man sang kaangay sini nga mga istruktura sa pungsod, mangin sa ila probinsiya sa North Cotabato nga wala lamang nagapakita sang korapsyon kundi pati man sang katangahan.
Mahibaluan nga ang lugar ang masami nga ginabahaan sa tion nga magmunog ang ulan kag kun kaisa, indi na maagyan sang tanan nga sahi sang mga salakyan.
