Nagnubo sang 20.74% ang index crime sa bilog nga Western Visayas sandig sa data sang Police Regional Office (PRO)-6 humalin Enero tubtob Setyembre subong nga tuig 2025.
Lakip sini amo ang murder, homicide, rape, physical injury, crime against property, theft kag carnapping.
Sa interview sang Bombo Radyo kay Police Major Lailyn Sencil, spokesperson sang Police Regional Office (PRO)-6, iya ginpahayag nga may yara sang 1,261 index crime incidents nga narekord subong nga tuig.
Manubo ini kun ipaanggid sa 1,591 cases nga narekord sang Enero tubtob Setyembre 2024.
Sa focus crimes, nakarekord ang PRO 6 sang 20.88% nga pagnubo halin sa 1,585 cases sang 2024 nga nangin 1,254 cases na lang subong nga tuig.
Suno pa kay Police Major Sencil, nagapadayon ang pagpatigayon sang hugot nga monitoring kaangay sang paglibot sang mga mobile patrol, mga checkpoints kag mga community engagement nga ginapatigayon sa pila ka mga kabarangayan.
Ginahingyo man sang natungdan ang kooperasyon sang tanan nga pumuluyo sa bulig sang local government unit kag barangay council agud malikawan ang krimen.
