Ginkumpirmar ni Police Chief Master Sergeant Ramil Arcangeles, tagpamaba sang Roxas City Component Police Station nga indi lang isa ang nagsumbag-patay sa isa ka lalaki sa Teodoro Arcenas Trade Center kundi duha ka persona.
Suno sa panaysayon ni Arcangeles, nakabaton sila sang impormasyon nga luyag sang mga suspetsado nga boluntaryo magsungka sa mga otoridad apang, tubtob sa karon wala sa gihapon nagapakita ang mga ini sa police station.
Samtang, ginahulat nalang sang mga kapulisan ang resulta sang Postmortem examination agud maplastar sang maayo ang mga impormasyon kag mapasakaan na sang nagakaigo nga kaso ang mga suspetsado.
Matandaan nga ginkilala ang biktima kay Rodante Villaranda, 39-anyos kag residente sang Barangay Inzo Arnaldo, Roxas City.
Nahibaluan nga Dead on arrival na sang ginpandangat sa Roxas Memorial Provincial Hospital, ang biktima matapos ginaalegar nga ginsumbag sa Teodoro Arcenas Trade Center.
Sa karon, nagapadayon pa ang imbestigasyon sang mga kapulisan angut sa insidente.
