ROXAS CITY – Nagdangat sa 52°C ang temperatura nga nabatyagan sang mga pumuluyo sa pungsod Portugal sang nakaligad nga semana kun sa diin padayon sa gihapon ang tuman kainit nga ila nabatyagan tubtob sa karon.
Ini ang ginpahayag ni Ms. Jodalyn Calagui, Bombo International Correspondent sa Portugal sang mainterview sang Bombo Radyo.
Suno diri, nagasugod ang heat wave ukon kainit sang temperatura alas 10:00 sang aga tubtob alas 3:00 sang hapon, apang pag-abot sa gab-i nagalamig man kun sa diin nagalab-ot lamang sa 17°C, gani masiling niya posible indikasyon ini sang climate change.
Apang, apisar tuman ang kainit, padayon sa gihapon ang mga pumuluyo sa pagpadulong sa ila mga trabaho kag alerto nalang sa pagpamati sa mga balita agud gilayon mahibaluan nila ang sitwasyon ilabi na kun may magluntad nga wildfire ukon forest fire.
Nagpaalinton naman ang gobyerno sang Portugal kag gindumilian ang mga pumuluyo nga indi maghaboy sang sigarilyo ilabi na sa may mga puno ukon hilamon bangud masami ini ang ginasugudan sang sunog.
Nakapagkit ang pungsod Portugal sang 659 nga nagkalamatay may kaangtanan sa heat wave ukon mainit nga temperatura.
Laygay naman ni Calagui sa mga kasubong nga OFW’s sa Portugal, magpabilin sa lugar nga indi makahoy kag itsekyar ang lugar kun ginluntaran ini sang forest fire bangud posible liwat magluntad ang heatwave amu man sa mga turista.
