ROXAS CITY – Yara na sa estable nga kondisyon ang 39-anyos nga inmate nga nagtuyo magpanginmatay pinaagi sa paglaslas sang pulso sa sulod sang Capiz Rehabilitation Center sa probinsiya sang Capiz.
Sino kay CRC Jailwarden Arjuna Yngcong, nakit-an ang duguan nga si alyas Dodoy sang isa ka inmate sa sulod sang iya nga isolation cell sa nasambit nga facilidad.
Gilayon sini nga ginpahibalo ang insedente sa mga jailguards nga amo ang nagdala sang inmate sa ospital, sa diin ginbulong ang naangkon nga samad.
Ginahibalo sa karon sang CRC kun diin nakuha ni alyas Dodoy ang blade nga gingamit sa tuyo nga magpanginmatay.
Samtang gin-athag ni Yngcong nga ginpahamtang sa isolation cell ukon ginseparar si alyas Dodoy sa iba pa nga mga inmates, bangud may diperensiya ini sa paminsaron kag kun kaisan bayolente kag nagapanakit sang kasubong nga preso.
Nagduda sila nga may diprensiya sa paminsaron ang nasambit nga inmate bangud nakita nila ini nga nagakaon sang buhi nga manok kag may panghulagon nga indi kasubong sa normal nga tawo..
Nahibaluan nga nagapangatubang sang kaso nga paglapas sa RA 10591 ukon illegal possession of firearms si alyas Dodoy nga residente sang banwa sang President Roxas, Capiz.
