Nagpaandam ang isa ka doktor sa importansya sang insakto nga paggamit sang antibiotics kag iban pa nga antimicrobials agud mapakigbatuan ang padayon nga pagtaas sang antimicrobial resistance (AMR).
Sa interview sang Bombo Radyo kay Dr. Jerrymae R. Blasurca, Medical Specialist II sang Senator Gerardo M. Roxas Memorial District Hospital, iya ginpahayag nga angantimicrobial resistance (AMR) nagakatabo kun ang mikrobyo nagadevelop sang resistensya ukon indi na maapektuhan sang antibiotics nga ginatigana sa iya.
Suno kay Dr. Blasurca, may kinalain ang antibiotic kag antimicrobial sa diin nga ang antibiotics partikular nga naga-target sang bakterya kag ang antimicrobials mas malapad ang sakop kag nagaapekto sa bakterya, virus, fungi, kag parasites.
Pahayag pa nya, indi tanan nga bakterya pareho ang reaksyon sa antibiotics, may ara nga mikrobyo nga resistant kag indi na maperwisyo sang pila ka klase sang bulong. Bangud sini, importante gid nga sundon ang laygay sang doktor sa pag-inom sang antimicrobials agud malikawan ang sobra-sobra kag indi husto nga paggamit.
Nagahingyo naman ang natungdan sa publiko nga kilalahon ang antibiotic stewardship, nga isa ka programa nga nagapromote sang responsable kag epektibo nga paggamit sang antibiotics para mapabilin nga epektibo ang mga ini sa masunod nga henerasyon.
