ROXAS CITY – Intriga ang nakita nga rason ni Capiz 1st District Congressman Emmanuel Billones Sr., sa pagpahalin ni President Rodrigo Duterte kay Ismael “Mike” Sueno bilang Department of Interior and Local Government (DILG) secretary.
Suno kay Congressman Billones Sr., daku ang posibilidad nga may nagakahinabo nga power struggle sa sulod sang departamento sa diin nagapakitang gilas ang bag-uhanon nga mga undersecretaries nga luyag makapwesto apang kulang pa sa abilidad.
Bangud sa indi maayo nga relasyon sang mga opisyal, naapektuhan na ang pagdumala sa ahensiya.
Posible man nga may nakita nga sala ang iban nga kaupdanan ni Sueno nga nangin rason para isugid ini kay President Duterte.
Samtang gindepensahan naman sang kongresista si DILG Usec Austere Panadero.
Suno kay Billones nga indi loyal bisan kay sin-o si Panadero, bangud kilala niya ini bilang opisyal sang DILG nga ginahimo lamang sang ensakto ang trabaho.
