Ginpanginwala sang Iran nga may gin-umpisahan sila nga paghinun-anon sang Estados Unidos sang Amerika matapos gin-anunsyo ni US President Donald Trump nga gin-postpone sini ang plano nga pag-atake sa power grid.
Suno kay Trump, may yara sang “very good and productive conversation” sa likod sang ginaalegar nga negosasyon, gani nagdesisyon ini nga ipaiway ang mga military attacks batok sa energy plant sang Iran sa sulod sang lima ka adlaw.
Katuyuan sini nga mapatigayon ang isa ka diplomatiko nga solusyon kag malikawan ang mas mabaskog nga inaway sa bahin sang Middle East.
Apang, hugot nga ginpanginwala sang mga opisyal sang Iran ang nasambit nga pahayag.
Suno kay Iran parliament speaker Mohammad Baqer Qalibaf, “fake news” ang amo nga statement ni Trump bangud wala sang direkta nga komunikasyon ukon negosasyon nga natabo sa tunga sang duha ka pungsod.
Nahibaluan nga matapos nagpaandam si Trump nga atakehon sang US ang energy infrastructure sang Iran, nagpamahog man ang Iran nga magatimalos man sila kun magpadayon ang anuman nga pag-atake sa ila mga pasilidad, lakip na ang energy kag water infrastructure sa rehiyon.
Bilang resulta, ang tensyon nagapabilin nga mataas indi lang sa tunga sang Iran kag Estados Unidos kundi pati man sa mga kalapit nga pungsod sa Middle East.
