Isa ang patay kag tatlo ang pilason sa natabo nga pagbunggo sang van sa poste sang arko sa boundary sang Ivisan, Capiz kag Balijuagan, Roxas City.
Ang napatay amo si Remmy Palmis,isa sa mga pasahero sang van kag residente sang St. Francis Subdivision, Barangay Tanque, Roxas City.
Sa interview sang Bombo Radyo kay Police Chief Master Sergeant Ramil Arcangeles, Spokesperson sang Roxas City Component Police Station, iya ginpahayag nga ang biktima ang nagapungko sa front seat sang van.
Suno kay Arcangeles, gindala pa man sa ospital si Palmis apang ginbawian sang kabuhi bangud ginaalegar nga gin-atake ini sa tagipusuon.
Nagapabilin naman sa ospital ang iban pa nga pasahero nga sanday Rhanzel Gonzales, 26 anyos, residente sang Barangay Balijuagan, Roxas City kag Arzenith Estolas, 48 anyos kag residente sang Arnaldo Boulevard, Barangay Baybay Roxas City amo man ang driver sang van nga si Ernie Wago, 57 anyos, residente sang New Road Barangay Banica, Roxas City.
Dugang pa sang natungdan, ginapahayag nga madasig ang padalagan sang driver rason nga nadulaan ini sang kontrol kag nabunggo sa poste.
