DAGUPAN CITY, PANGASINAN- Nagresulta sa pagbayluhanay sang inumol ang liga sang basketball sang mga kabataan sa isa ka barangay sa Dagupan City, Pangasinan.
Ang mga naulamid sa kinagamo, gindumilian na nga maghampang sa kabug-usan sang liga.
Sa kuha sang Closed Circuit Television (CCTV) camera, makit-an ang duha ka mga manughampang halin sa magkatuhay nga team nga tuman ang pagbantay sa tagsa-tagsa. Tubtob sa nagkomprontahan ang duha kag nagsumbaganay.
Wala magdugay kag nag-intra man sa kinagamo ang pila pa ka mga kabataan halin sa magkatuhay nga team.
Ginpatawag naman sang barangay ang siyam nga kabataan nga naulamid sa kinagamo nga yara sa edad 17 tubtob 18 upod ang ila nga mga ginikanan.
Suno kay Jhamel Ryan Cabtbat, SK Chairman sang Barangay Pantal, nadesisyonan sang mga opisyal nga dumilian na nga maghampang ang amo nga mga kabataan nga involved sa kinagamo.
Bangud man sa nasambit nga insidente, ginamando sang chairman sang barangay nga dapat may bantay nga tanod kag pulis sa tagsa ka may hampang para sa liga. Katuyuan sini agud nga malikawan ang gamo ilabi na kag kun mainit ang pagpaindis-indis.
Ginsuporthan naman sang mga residente ang nasambit nga tikang sang barangay chairman.
