Tuman nga kalipay ang nabatyagan sang isa ka bata nga babayi nga nag-viral matapos sini nga ginpautwas ang nabatyagan nga stress samtang nagagutos sa dalan sang Sitio Balud, Barangay Duyoc, Dao, Capiz.
Ginkilala ang amo nga bata kay Althea, 6-anyos, isa ka grade 1 student kag residente sang nasambit nga barangay.
Sa interview sang Bombo Radyo kay Mary Jane, tiya ni
Althea, tuman ang nabtyagan nila nga kalipay bangud gilayon nga gin-aksyonan sang Dao LGU ang problema nga numero uno nga nagasugata sa ila kag sa mga pumuluyo sang nasambit nga lugar.
Nakakuha sang masobra 150,000 nga views ang video ni Althea nga kun sa diin makita ang malutak nga dalan nga iya ginagutos adlaw-adlaw nga nakakuha man sang nanari-sari nga komento sa mga netizens.
Bangud sa amo nga viral video, madasig nga gin-aksyonan sang Dao LGU sa pagpamuno ni Mayor Jose Jimbo Barruela. Gilayon nga ginpadal-an sang pila ka truch sang buga sang alkalde ang ginareklamo nga dalan.
Nagapasalamat naman si Mary Jane, Althea kag mga pumuluyo bangud sa madasig nga aksyon sang lokal nga gobyerno sang nasambit nga banwa.
